Menntaskólinn Hraðbraut hefur hlotið viðurkenningu hins opinbera og mun hefja störf að nýju í haust eftir tveggja ára hlé. Þetta segir í tilkynningu frá skólastjóra Hraðbrautar, Ólafi Hauki Johnson, en rekstur skólans lagðist af í júní 2012 eftir að þjónustusamningur við stjórnvöld var ekki endurnýjaður.
Í tilkynningunni segir að menntamálaráðuneytið hafi veitt skólanum skriflega viðurkenningu til kennslu til stúdentsprófs á náttúruvísindabraut og hugvísindabraut. Viðurkenning á skólanum hafi verið í vinnslu í ráðuneytinu í nokkurn tíma.
