Vífilstaðavatn mun betra en í fyrra

Þeir veiðimenn sem hafa lagt leið sína í Vífilstaðavatn síðustu daga segja að veiðin í vatninu sé mun betri en í fyrra.

Það er ekki óalgengt að heyra af mönnum sem eru að fá 6-8 fiska eftir stutt stopp en besta veiðin virðist vera seint á kvöldin en þá virðist vera nokkur hreyfing á fiskinum.  Besta vindáttin er þegar vindur stendur frá suðurbrekkunni, ýmist smá í austur eða smá í vestur en það virðist ekki breyta miklu hvaðan blæs svo lengi sem hann er sunnanverður.  Það er óþarfi að vaða mikið út í því fiskurinn tekur oft mjög nálægt landi og það eina sem hefst upp úr því að vaða út er að þú ýtir fiskinum á undan þér lengra út í vatnið.  Það sem helst hefur verið að gefa er fluga og þá litlar svartar púpur eins og Svartur Taylor, Toppflugan og Mobuto.  Þeir sem veiða mest tala allir um að nota sömu tæknina, þ.e.a.s. að nota langa granna tauma, 4-6 punda er til að mynda alveg feykinóg, og draga lúshægt inn.  Ef það er mikil yfirborðstaka þá má draga aðeins hraðar inn.  Fiskurinn er í vatninu er kannski ekki stór en algengar stærðir eru 400-800 gr en inn á milli koma þó vænni fiskar.  Vatnið er frábært fyrir byrjendur en það þarf eins og oft að gefa því tíma og læra á það til að veiða vel í því en það er sannarlega þess virði að gefa því tímann.