Ekki séð ástæðu til að svara fyrir ummæli Kristínar

Dagur B. Eggertsson, oddviti Samfylkingarinnar í Reykjavík, var inntur eftir viðbrögðum við ummælum Kristínar Soffíu Jónsdóttur í þættinum Harmageddon á útvarpsstöðinni X-inu í dag.

Kristín sagði í kjölfar auglýsingar frá Rússnesku rétttrúnaðarkirkjunni árið 2012 að söfnuðurinn mætti „fokka sér“ og að „ömurlegt“ væri að Reykjavíkurborg væri búin að útdeila lóð til þessa „skítasafnaðar“.

Auglýsingin birtist sama dag og Gleðiganga samkynhneigðra fór fram í Reykjavík. Hún var túlkuð sem árás á samkynhneigða og hljóðaði svo:

„Ef kristið fólk þegir þá talar Biblían....

Villist ekki! Hvorki munu saurlífismenn né skurðgoðadyrkendu, hórkarlar né kynvillingar, þjófar né ásælni, drykkjumenn, lastmálir né ræningar Guðs ríki erfa. (Fyrra bréf Páls til Korin 6:9-10)“.

Dagur sagði í viðtalinu að Kristínu þætti allt þetta mál „náttúrulega bara mjög leiðinlegt“. „En ég skil um leið að henni hafi orðið bilt við þegar þetta birtist á Gay Pride á sínum tíma,“ bætti Dagur við í kjölfarið.

Yngri systir Kristínar er samkynhneigð og sagði Kristín frá því í gær hvernig hún hafði upplifað auglýsinguna sem árás á sig og sína fjölskyldu. Dagur sagðist sýna því skilning. „Auglýsing þar sem einhver segir að hinsegin fólk muni brenna í víti hleypir fólki auðvitað kappi í kinn.“

Hann segir ummæli Kristínar þó byggð á ákveðnum misskilningi. „Svo kom í ljós að þessi auglýsing var ekki frá Rússnesku rétttrúnaðarkirkjunni. Það var einhver safnaðarmeðlimur sem keypti hana,“ sagði Dagur í viðtalinu og segir hann þá staðreynd hafa haft áhrif á ummæli hennar.

Þessi staðhæfing þó ekki allsendis rétt enda hefur Vísir greint frá því að sá sem auglýsinguna keypti hafi raunar verið Rússneska rétttrúnaðarkirkjan á Íslandi, en ekki einhver einn einstaklingur innan hennar. Dagur segir það þó ekki höfuðatriði. „Það sem skiptir mestu máli er að mér þykir Kristín hafa útskýrt þetta ágætlega í gær og notaði tækifærið og baðst afsökunar.

Hann kannast ekki við að afsagnar Kristínar hafi verið krafist vegna ummælanna en Jónas Kristjánsson og Þráinn Bertelsson hafa farið fram á að hún stígi til hliðar. Degi þætti slík afsögn ganga of langt. „Hún er búin að biðjast afsökunar, hún setti fram þessi ummæli því henni var mjög misboðið og mér fannst hún gera góða grein fyrir því.“



Ummæli Kristínar annars eðlis en Sveinbjargar

Árni Páll Árnason, formaður Samfylkingarinnar, tekur í sama streng. Hann segist ekki hafa séð ástæðu til að svara fyrir þessi ummæli Kristínar. „Enda er hún búin að svara fyrir sig,“ sagði Árni í samtali við Vísi.

Aðspurður um líkindi milli ummæla Kristínar Soffíu og þeirra ummæla sem Sveinbjörg Birna Sveinbjörnsdóttir lét falla fyrir helgi um úthlutun lóðar undir mosku segir Árni Páll töluverðan eðlismun á þeim tveimur. Ummæli Kristínar væru ekki pólitísk yfirlýsing í aðdraganda kosninga, ólíkt ummælum Sveinbjargar. 

„Þau voru ekki látin falla í ávinningsskyni heldur sem viðbrögð við árás á mannréttindi samkynhneigðra. Þau voru sett fram í reiði og hún hefur beðist afsökunar á því að hafa farið offari,“ segir Árni og bætir við að hann telji hana meiri manneskju fyrir vikið.

Árna Páli undirstrikar að Samylkingin telur trúfrelsið vera einn hornsteina lýðræðisvitundar þjóðarinnar. „Það er alveg ljóst að það er ekki hægt að mismuna trúfélögum og hefur Samfylkingin við stjórn borgarinnar alla tíð lagt mikla áherslu á trúfrelsi og að hlúa að trúarlífi Reykvíkinga.“