WOW air kærir úrskurð Héraðsdóms Reykjavíkur

Flugfélagið WOW air hefur ákveðið að kæra úrskurð Héraðsdóms Reykjavíkur til Hæstaréttar um að vísa máli sem snýr að úthlutun afgreiðslutíma á Keflavíkurflugvelli frá dómi.

Lögmaður WOW air segir núverandi ástand leiða af sér fákeppni og einokun sem sé til mikils tjóns fyrir neytendur, almenning og WOW air.

„Úthlutun Isavia á afgreiðslutímum stendur í vegi fyrir því að WOW air geti hafið flug til Bandaríkjanna og við það verður ekki unað. Það er því ekkert annað að gera en að fara áfram með málið“ segir Páll Rúnar M. Kristjánsson lögmaður WOW air.

Páll segir niðurstöðu réttarins byggja á því að hagsmunir WOW af rekstri málsins sé með einhverjum hætti óljósir.

„Á þetta er ekki hægt að fallast. Samkeppniseftirlitið úthlutaði WOW air ákveðnum takmörkuðum gæðum, afgreiðslutímum á Keflavíkurflugvelli, sem gera félaginu kleift að hefja flug til áfangastaða í Norður Ameríku. Með niðurstöðu áfrýjunarnefndar var þessi réttur hins vegar tekinn af WOW air. Félagið hefur alltaf ríka og lögvarða hagsmuni af því að fá úr því skorið hvort að sú íþyngjandi ákvörðun var rétt. Þannig er það nú bara,“ segir Páll.

Tildrög málsins eru þau að WOW air kvartaði til Samkeppniseftirlitsins vegna úthlutunar á afgreiðslutímum á Keflavíkurflugvelli sem flugfélagið telur samkeppnishamlandi.

WOW air telur að úthlutunin á afgreiðslutíma komi í veg fyrir að það geti keppt við Icelandair með því að setja upp leiðarkerfi eða tengiflug á milli Evrópu og Bandaríkjanna þar sem Keflavíkurflugvöllur er miðstöð tengiflugsins. Í málinu hefur WOW Air haldið því fram að forsenda þess að geta sett upp slíkt leiðarkerfi í samkeppni við Icelandair sé sú að fá úthlutað afgreiðslutímum á álagstímum.

Í úrskurði Samkeppniseftirlitsins frá nóvember 2013 telur Samkeppniseftirlitið að núverandi fyrirkomulag úthlutunar á afgreiðslutímum hafi leitt til þess að Icelandair hafi haft forgang að næstum öllum mikilvægustu afgreiðslutímum á flugvellinum.