Glæsileg voropnun í Húseyjakvísl

Húseyjakvísl í Skagafirði opnaði 1. apríl eins og aðrar sjóbirtingsár og opnunin þar er síst glæsilegri en í þekktari ánum á suðausturlandi.

Félagsskapur sem kallar sig Mokveiðifélagið, þrátt fyrir að sleppa svo til öllu sem þeir veiða, opnaði ánna og það verður ekki annað sagt en að veiðin hafi verið sérlega glæsileg hjá þeim félögum.  Alls komu 42 sjóbirtingar á land, slatti af hoplaxi og mikið af urriða af öllum stærðum og gerðum sem voru ekki taldir með í aflanum.  Stærsti sjóbirtingurinn sem náðist á land var um 80 sm langur en Sævar Örn Hafsteinsson missti fisk sem þeir telja að hafi verið stærri.  Mesta veiðin var við þau skilyrði þegar  snjóbráð náði í ánna, vatns- og lofthiti hækkaði en þá var oft mikið líf í öllum hyljum sem voru kannaðir.  Núverandi leigutaki hefur gert gríðarlega gott átak í því að öllum fiski sé sleppt aftur í ánna að lokinni viðureign og það sýnir sig best á hækkandi veiðitölum í sjóbirting og laxi að sú friðun er að skila tilætluðum árangri.  Það getur því verið veisla fyrir þá sem eiga daga framundan í Húseyjakvísl enda þeir 42 birtingar sem tóku flugur Mokveiðimanna í opnun ennþá syndandi um í ánni.  Frekari upplýsingar um veiðiferðina er inná vef félaganna www.veidimenn.com.