McIlroy: Skiptir engu máli hverjum er spáð sigri

Rory McIlroy kemur nokkuð heitur til leiks á Masters-mótinu í golfi sem hefst á fimmtudaginn en hann lauk leik á Houston-mótinu um síðustu helgi með frábærum lokahring.

Rory gekk ekkert framan af móti en hann fór síðasta hringinn á sunnudaginn á sjö höggum undir pari og lyfti sér upp í sjöunda sæti.

„Þetta var góð leið til að undirbúa sig fyrir vikuna. Það gekk ekkert upp í Houston fyrr en á lokdeginum. Síðasti hringurinn í Houston var eitthvað sem ég vissi að ég gæti en ekki hvernig ég átti að kalla fram. Þessi hringur gefur mér aukið sjálfstraust fyrir Masters-mótið,“ segir McIlroy í viðtali við BBC.

„Mér finnst ég vera að toppa núna. Ég tók einn og hálfan tíma á æfingasvæðinu í dag og var að slá boltann vel. Mér hefur sjaldan liðið jafnvel með spilamennsku mína fyrir Masters-mót eins og núna,“ segir hann.

McIlroy er spáð sigri af mörgum veðbönkum en þessi 24 ára gamli Norður-Íri hefur aldrei unnið Masters-mótið. Hann hefur í tvígang unnið risamót: Opna bandaríska árið 2011 og PGA-meistaramótið árið 2012.

„Núna snýst þetta bara um að halda væntingunum niðri og fara ekki fram úr sjálfum mér. Ég þarf að spara orkuna og nýta hana á keppnisdögunum fjórum.“

„Ég hef verið talinn líklegastur til að vinna mörg mót áður þannig það er ekkert nýtt fyrir mér. Þetta snýst meira um hvernig mér líður með spilamennskuna. Ég verð bara að halda áfram að spila eins og ég hef verið að gera. Hvern veðmangararnir telja líklegastan til sigurs skiptir engu máli, segir Rory McIlroy.