Viðskipti innlent

Hótel nýjasta viðbótin í viðreisn Siglufjarðar

Kristján Már Unnarsson skrifar
Róbert Guðfinnsson athafnamaður hefur hafið smíði hótels á Siglufirði með gistirými fyrir allt að 140 gesti. Þetta er liður í stórfelldri uppbyggingu sem hann stendur fyrir í þessum fornfræga síldarbæ. Í þættinum „Um land allt“ á Stöð 2 annaðkvöld, þriðjudagskvöld, er Siglufjörður heimsóttur og rætt við Róbert og fleiri Siglfirðinga um þá endurreisn sem á sér stað í bænum þessi misserin.

Hótelið verður 68 herbergja og er stefnt að því að rekstur þess hefjist eftir eitt ár.
Fjárfestingar Róberts á undanförnum árum eru þegar farnar að setja sterkan svip á bæinn. Litskrúðug veitingahús og gallerí í byggingum sem áður voru í niðurníðslu lífga nú upp á mannlífið, líftæknifyrirtækið Genís vinnur að þróun fæðubótarefna og lyfja, en nýjasta táknið um framkvæmdir Róberts er stór byggingarkrani við höfnina.

„Byggingarkrani verður sjaldan tákn mitt,” svarar Róbert en staðfestir að kraninn þjóni þeim tilgangi að reisa 68 herbergja hótel sem vonast sé til að verði komið í rekstur vorið 2015.

Stór byggingarkrani er kominn upp á lóð hótelsins.Mynd/Jón Steinar Ragnarsson.
Milli fimmtán og tuttugu iðnaðarmenn vinna að smíði hótelsins, sem að hluta fer fram innandyra með forsmíði eininga. Róbert byggir ferðaþjónustuna upp í kringum smábátahöfnina á Siglufirði, hún á að verða hjartað. Hótelbyggingin verður L-laga og segir Róbert að úr hverju einasta herbergi verði útsýni yfir báta eða aðra athafnasemi tengda sjónum. 

Þátturinn “Um land allt” á Stöð 2 er á dagskrá kl. 19.20 annaðkvöld en þar verður fjallað ítarlega um fjárfestingar Róberts á Siglufirði.

Róbert á veitingastaðnum Hannes Boy. Húsgögnin eru gerð úr tequila-tunnum.Stöð 2/Baldur Hrafnkell Jónsson.





Fleiri fréttir

Sjá meira


×