Frávísun í Aserta-málinu

Héraðsdómur vísaði í dag frá ákæru sérstaks saksóknara á hendur fyrrum handboltamanninum Markúsi Mána Michaelsyni og þremur öðrum sem var gefið að sök að hafa brotið gróflega gegn lögum um gjaldeyrisviðskipti.

Málinu var vísað frá vegna óskýrleika í ákæru sérstaks saksóknara en fjórmenningunum var gefið að sök að hafa stundað viðskipti með krónur á aflandsmarkaði í gegnum eignarhaldsfélagið Aserta fyrir rúmlega 14 milljarða króna á árinu 2009 og hafa þannig hagnast um meira en 600 milljónir króna.

Í tölvupósti sem Embætti sérstaks saksóknara sendi verjendum mannanna í morgun, fyrir úrskurð héraðsdóms, kemur fram að embættið líti svo á að gjaldeyrisviðskipti mannanna hafi ekki talist brot á gjaldeyrishöftum heldur hafi þeir eingöngu gerst sekir um að hafa stundað viðskipti með gjaldeyri án þess að hafa til þess leyfi. Brot sem er mun vægara en það sem upphaflega var ákært fyrir.

Samkvæmt heimildum fréttastofu er ástæðan fyrir því að ekki var hægt að halda ákærunni til streitu að því er varðar brot á gjaldeyrishöftum sú að reglur um gjaldeyrismál voru settar án staðfestingar viðskiptaráðherra eins og lög um gjaldeyrisviðskipti kváðu á um og því sé ekki hægt að byggja refsingu á reglunum.

Einn verjenda fjórmenninganna segir úrskurðinn staðfesta að enginn refsiverð háttsemi hafi átt sér stað og að Aserta hafi stundað lögmæt viðskipti. Hann segir skjólstæðing sinn hafa beðið hnekki af málsmeðferðinni þar sem eignir hans hafi meðal annars verið kyrrsettar tvisvar auk þess sem málsmeðferð hafi dregist óhóflega.