Bíður yfirheyrslu vegna gruns um íkveikju

Maður á þrítugsaldri bíður þess nú að vera yfirheyrður eftir að lögregla handtók hann vegna gruns um íkveikju á Selfossi í morgun.

Í tilkynningu frá lögreglu segir að á sjöunda tímanum í morgun hafi íbúi á efri hæð íbúðarhúss við Birkivelli tilkynnt um eld logandi í íbúð á neðri hæð. Íbúinn hafði vaknað við sprengingu og sagði eld loga út um glugga á neðri hæðinni. Slökkvilið slökkti eldinn og ekki urðu slys á fólki. Mikið tjón varð þó á neðri hæðinni og einnig fór reykur um allt húsið.

Fyrsta aðkoma á vettvangi benti til þess að um íkveikju væri að ræða og styður frumrannsókn lögreglu og tæknideildar lögreglunnar á höfuðborgarsvæðinu þær grunsemdir. Í þágu rannsóknar málsins var maðurinn handtekinn.

Lögregla biður alla þá sem telja sig hafa orðið vara við grunsamlegar mannaferðir sem tengst gætu máli þessu að hafa samband í síma 480-1010