Danir hafa hagnast mest á innri markaðnum

Danir og Þjóðverjar hafa hagnast mest á stækkun innri markaðar ESB á árunum frá 1992 til 2012. Þetta kemur fram í rannsókn þýsku stofnunarinnar Bertelsmann Stiftung og birt var í gær.

Á árunum tuttugu jókst landsframleiðsla í Þýskalandi um 37 milljarða evra á ári að meðaltali, sem jafngildir árlegri tekjuaukningu um 450 evrur fyrir sérhvern Þjóðverja. Tekjuaukning Dana er nokkru hærri, eða um 500 evrur á ári. Austurríkismenn, Finnar, Svíar og Belgar skipa svo næstu sæti listans.

Portúgalir skipa neðsta sæti listans með einungis 20 evru tekjuaukningu á ári. Spánverjar og Grikkir hafa svo verið með um 70 evru tekjuaukningu á hverju ári.

Í frétt EU Observer segir að rannsóknin byggi á notkun tölfræðilegra og stærðfræðilegra aðferða stofnunarinnar sem mæli áhrif innri markaðarins á hagvöxt. Fjórtán lönd voru rannsökuð, eða aðildarríki ESB fyrir stækkun sambandsins til austurs árið 2004 og síðar, að Lúxemborg frátöldu.

Rannsóknin tók einnig til þess hvernig ríkjum hefði farnast ef ekki hefði komið til aukinnar samrunaþróunar Evrópu. Er niðurstaðan sú að Þýskaland og Danmörk myndu hafa tapað mest. Hefði innri markaðurinn ekki komið til hefði mátt afskrifa um tvö prósent landsframleiðslunnar í báðum ríkjunum. Myndi slíkt hafa leitt til árlegs 720 evru tekjumissis fyrir sérhvern einstakling í Danmörku en 680 evru tekjumissi fyrir hvern Þjóðverja.

Samkvæmt rannsókn stofnunarinnar myndi einungis Grikkland hafa hagnast ef innri markaðinum hefði ekki verið komið á. Landsframleiðsla hefði verið 1,3 prósent hærri og skilað sér í um 190 evru tekjuaukningu á hverju ári fyrir hvern Grikkja.