Í gær kom í ljós að Serge Ibaka, framherji Oklahoma City Thunder, getur ekki leikið meira með liðinu í úrslitakeppni NBA-deildarinnar í körfubolta. Ibaka meiddist á kálfa í sjötta leik Oklahoma og Los Angeles Clippers í undanúrslitum Vesturdeildarinnar.
Þetta er mikið áfall fyrir Oklahoma, en Ibaka hefur verið í lykilhlutverki hjá liðinu undanfarin ár og þykir meðal bestu varnarmanna deildarinnar.
Ibaka, sem fæddist í Lýðveldinu Kóngó en leikur með landsliði Spánar, skoraði 15,1 stig að meðaltali í leik í vetur, tók 8,8 fráköst og varði 2,7 skot.
Ibaka spilaði 13 leiki í úrslitakeppninni í ár og skoraði í þeim 12,2 stig að meðaltali, tók 7,3 fráköst og varði 2,2 skot.
Oklahoma mætir San Antonio Spurs í úrslitum Vesturdeildarinnar, en fyrsti leikur liðanna fer fram á mánudaginn í San Antonio.
Fram
Þróttur
