Mikilvægt að skilja á milli tryggingasjóðs nýs bankakerfis og þess gamla

„Þegar ég var ráðherra þá lagði ég fram frumvarp sem fjallaði um að skilja á milli nýs tryggingasjóðs bankakerfisins og þess gamla, en það náði ekki fram,“ segir Gylfi Magnússon, hagfræðiprófessor og fyrrum viðskiptaráðherra um ákvörðun Breta og Hollendinga að lögsækja Tryggingasjóð innistæðueigenda og fjárfesta - TIF, vegna Icesave deilunnar. 

Viðbrögð hans við fréttum af lögsókn Breta og Hollendinga gegn Tryggingasjóði innistæðueigenda og fjárfesta – TIF, eru að rifja upp þetta frumvarp og brýna fyrir mönnum mikilvægi þess að skilja á milli tryggingasjóðs nýs bankakerfis og þess gamla. „Það gengur ekki að þeir sem eiga kröfur í gamla TIF – eigi kröfur í nýtt tryggingakerfi á bankainnistæðum. Það er óþolandi ástand.“

„Það kemur mér á óvart að þetta sé fyrir dómstólum, því ég hélt að þetta væri nokkuð ljóst að innistæðueigendur í Hollandi og Bretlandi ættu kröfu í TIF, en það eru greinilega einhverjir lausir endar í málinu,“ útskýrir Gylfi.