Hefði getað svipt sparisjóðina starfsleyfi

Fjármálaeftirlitið hefði getað afturkallað starfsleyfi þriggja sparisjóða þar sem þeir uppfylltu ekki kröfur um eigið fé í meira en ár. FME lét það vera. Ályktanir nefndar um sparisjóði um störf FME eru takmarkaðar, en nefndin telur að engin dæmi séu um að FME hafi ekki sinnt lögbundnu hlutverki sínu við eftirlit með sparisjóðum.

Sérstakur kafli í skýrslu rannsóknarnefndar um sparisjóði er helgaður störfum Fjármálaeftirlitsins sem hafði eftirlit með sparisjóðunum.

Brotalamir í áhættustýringu

Úttektir Fjármálaeftirlitsins á stóru sparisjóðunum á árunum 2007 og 2008 leiddu ljós ýmsar brotalamir í starfi áhættustýringar sparisjóðanna en helstu aðfinnsluefnin vour þau að deildirnar væru ekki nógu stórar.

Rakið er í skýrslunni FME hafi þurft að benda bæði Sparisjóðnum í Keflavík og Sparisjóði Mýrarsýslu á að engar reglur um áhættustýringu hafi verið til staðar.

Áhættusókn sparisjóðanna leiddi til falls þeirra. Ef áhættustýring var ekki til staðar þá geta lesendur sagt sér að taumhaldið var ekki mikið.

Hæft fólk fékkst ekki til að vinna í áhættustýringu SPM

Í bréfasamskiptum FME og Sparisjóðs Mýrarsýslu kom fram að hæft fólk fengist ekki til að vinna í áhættustýringu fyrir sparisjóðinn. Og þess vegna hafi áhættustýringu verið ábótavant. Stjórn sparisjóðsins hafi vitað þetta og látið FME vita en þeirri spurningu er ósvarað hvort FME hafi gengið á eftir sparisjóðnum hvað þetta varðar.

Rannsóknarnefndin fjallar líka um FME eftir hrun viðskiptaankanna á haustmánuðum 2008. Þennan vetur áttu sparisjóðirnir í miklum lausa- og eiginfjárvandræðum.

Þrír sparisjóðir störfuðu í meira en 12 mánuði eftir að FME veitti þeim fyrst frest til að koma eiginfjárhlutfalli sínu yfir lögbundið lágmark. FME hefði getað afturkallað starfsleyfi, en gerði það ekki. 

Á meðan þeir uppfylltu ekki lengur skilyrði laganna héldu þeir áfram að tapa peningum á kostnað skattgreiðenda.

Starfsemi Fjármálaeftirlitsins er dregin saman af skýrsluhöfundum með svofelldum orðum: „Að mati rannsóknarnefndarinnar er vandkvæðum bundið að benda á einstök atriði þar sem Fjármálaeftirlitið sinnti ekki lögbundnu hlutverki sínu við eftirlit með starfsemi sparisjóða.“

Jónas Fr. Jónsson fyrrverandi forstjóri FME sagði í samtali við fréttastofuna í dag að hann teldi að skýrslan væri hófstillt og var hann ánægður með hana.

FME í tíð Jónasar fékk öllu verri útreið í skýrslu rannsóknarnefndar Alþingis um fall viðskiptabankanna sem birtist fyrir sléttum fjórum árum.

Almennar ályktanir

Ályktanir rannsókarnefndar Alþingis um sparisjóði um eftirlit FME eru takmarkaðar og að mestu almenns eðlis. Eins og: „Að mati rannsóknarnefndar Alþingis er nauðsynlegt að komið sé á festu í starfsemi Fjármálaeftirlitsins og að henni sé tryggður sá grundvöllur sem nauðsynlegur er til að byggja upp nægjanlega þekkingu og reynslu svo stofnunin sé í stakk búin til að sinna lögbundnu hlutverki sínu."

Ekki eru leiðbeiningar frá nefndinni um breytingar á lögum, eða neina lærdóma sem eru hönd á festandi, sem má draga af starfsemi FME fyrir hrun þegar sparisjóðir eru annars vegar.