Nowitzki kominn fram úr Reggie Miller

Þjóðverjinn Dirk Nowitzki hjá Dallas Mavericks heldur áfram að klífa stigalistann í NBA-deildinni og hann er nú orðinn fimmtándi stigahæsti leikmaður allra tíma í deildinni.

Nowitzki hirti fimmtánda sætið af Reggie Miller, goðsögn Indiana Pacers, í mögnuðum sigri gegn Houston þar sem Þjóðverjinn skoraði 35 stig.

Nowitzki er nú búinn að skora 25.298 stig á ferlinum og á eftir að bæta mörgum við.

"Það er ekki slæmt að vera kominn fram úr Miller. Mér hefði aldrei dottið í hug á sínum tíma að ég ætti eftir að vera á meðal fimmtán stigahæstu manna í sögu deildarinnar. Ef ég á samt að vera heiðarlegur þá var ég ánægðari með sigurinn en áfangann," sagði Nowitzki.

Kevin Garnett, leikmaður Brooklyn, er í fjórtánda sæti listans. Sá næsti sem Dirk getur náð er Alex English en hann skoraði 25.613 stig á sínum ferli.