Er Highway To Hell jólalagið í ár?

Í Bretlandi er ávallt mikil spenna hvaða lag vermir toppsætið yfir vinsælustu lög landsins um jólin. Á undanförnum árum hefur það nánast verið fastur liður að sigurvegari raunveruleikasjónvarpskeppninnar X-Factor eigi vinsælasta lag jólahátíðarinnar, eða í fimm skipti á undanförnum átta árum.

Nú hefur herferð verið hrundið af stað sem snýst um að fá aðdáendur AC/DC til að kaupa lagið Highway To Hell um jólin og á aðeins fjórum dögum hafa um 100þús einstaklingar gefið loforð um að taka þátt sem að öllum líkindum myndi tryggja laginu toppsætið. Yrði lagið, sem kom fyrst út árið 1979, þá fyrsta lag AC/DC til að komast inn á Topp 10 listann í Bretlandi.

Þetta er þó ekki í fyrsta skipti sem rokkaðdáendur ætla sér að koma í veg fyrir að X-Factor drullan skipi efsta sætið yfir jólin því árið 2009 sat Rage Against the Machine slagarinn Killing in the Name í efsta sætinu, og fékk þá X-Factor sigurvegarinn Joe McElderry þann vafasama heiður að vera fyrsti sigurvegari keppninnar sem átti ekki lag í efsta sæti um jólin.

Það verður því áhugavert að fylgjast með topplistanum í Bretlandi á næstu vikum.