Vináttan er vegurinn til lífsins

Bækur: Skrímslið litla systir mín

Saga:Helga ArnaldsMyndir:Björk BjarkadóttirTónlist:Eivör Pálsdóttir. Skrudda



Skrímslið litla systir mín eftir Helgu Arnalds fjallar um fimm ára myrkfælinn strák, Bjart, sem eignast litla systur. Honum líst síður en svo á nýjustu viðbótina við fjölskylduna og líkir henni við skrímsli sem allt virðist eyðileggja. Hann fer í langt ferðalag um dimma skóga, alla leið á hjara veraldar, og hittir fyrir óvættir og alvöru skrímsli í þeim tilgangi að skila systur sinni sem mamma hans sagði að væri gjöf frá guði. Og á leiðinni lærir hann að elska litlu systur sína.



Afbrýðisemi er algengt varnarviðbragð þegar barn þarf skyndilega að deila ást og athygli foreldra sinna með nýju barni og Skrímslið litla systir mín gerir því góð skil. Stóri bróðirinn þjáist af einmanaleik og höfnunarkennd en lærir svo að vináttan er vegurinn til lífsins.

Bókin er fallega myndskreytt af Björk Bjarkadóttur og tónlist Eivarar Pálsdóttur er skemmtileg viðbót við vandaða bók. Eins og aðrar fyrsta flokks barnabækur höfðar bókin bæði til barna og fullorðinna. Það er ánægjulegt þegar ungir og aldnir hafa gaman af sömu bókinni.



Samnefnd sýning var frumsýnd í Norræna húsinu í fyrra og hlaut Grímuverðlaun sem besta barnaleiksýningin.

Niðurstaða: Vönduð og fallega framreidd barnabók með boðskap sem á erindi við marga.