Flugvöllurinn og hlýnun jarðar

Hlýnun jarðar og fyrirséð hækkun sjávarborðs eru Páli Bergþórssyni, veðurfræðingi og fyrrverandi forstjóra Veðurstofunnar, hugleikin í færslu sem hann ritar á Facebook. Fyrirséð er að til aldamóta megi gera ráð fyrir að sjávarstaða hækki um einn til tvo metra í Reykjavík.

"Að þessu ættu þeir að huga sem vilja reisa íbúðabyggð í Vatnsmýri og eyðileggja flugvöllinn. Má hann ekki bíða örlaga sinna og gera ómælt gagn þangað til?“ veltir Páll fyrir sér.

Árni Finnsson, formaður Náttúruverndarsamtakanna, leggur þá orð í belg og bendir á að líka mætti hugsa sér að draga úr losun gróðurhúsalofttegunda til að bjarga Vatnsmýrinni og öðrum láglendum svæðum.