Valdi föt á Streisand

„Þetta var mjög skemmtilegt verkefni. Ég er tískustjórnandi fyrir viðburði hjá Film Society of Lincoln Center og starfið felur meðal annars í sér að fá fólk úr tískubransanum á viðburði sem þessa og einnig að velja fatnað á framkvæmdastjóra Film Society of Lincoln Center fyrir slíka viðburði,“ segir Edda Guðmundsdóttir stílisti. Hún valdi fatnað á Barbru Streisand þegar Film Society of Lincoln Center veitti henni heiðursverðlaun þann 22. apríl.

Edda starfar sem stílisti í New York og vinnur meðal annars við tískuþætti fyrir tímarit og auglýsingar ásamt því að hafa tekið að sér verkefni fyrir Oprah Winfrey og fréttakonuna Diana Sawyer. Edda segir samstarfið við Streisand hafa gengið vel og að söngkonan hafi mætt vel undirbúin fyrir viðburðinn. „Hönnuðurinn Donna Karan er ein af hennar bestu vinkonum og hún var líka á staðnum og skaffaði fötin,“ útskýrir Edda. Aðspurð segir hún Streisand vera viðkunnalega konu með einstakan fatastíl. „Hún er mjög ákveðin kona og vissi nákvæmlega hvað hún vildi. Mér fannst gott að vinna með henni og hún er mjög viðkunnaleg og almennileg.“ Edda var viðstödd verðlaunaafhendinguna, sem fram fór í Lincoln Center, og segir kvöldið hafa heppnast vel í alla staði.

„Bill Clinton hélt ræðu og Liza Minnelli og Tony Bennett sungu. Mér fannst þetta mjög skemmtilegt því þetta var svokallað „old Hollywood“ viðburður og það er sjaldan sem manni gefst tækifæri á að umgangast slíkar goðsagnir.“ Næsta verkefni Eddu fyrir Film Society of Lincoln Center verður að stílisera gesti á frumsýningu nýrrar kvikmyndar spænska leikstjórans Pedro Almodóvar, en myndin verður frumsýnd í Bandaríkjunum þann 4. júní. „Það er alltaf eitthvað nýtt og skemmtilegt verkefni að koma upp og síðustu þrjú ár hafa verið mikið kapphlaup við tímann,“ segir Edda að lokum.