Íslenskur drykkur gegn timburmönnum

„Við höfðum áður unnið innan matvælageirans og þekktum því umhverfið og möguleikana. Hugmyndin að drykknum kom upp eftir skemmtilegt kvöld í bænum. Okkur fannst skrítið að svona vara væri ekki í boði og í kjölfarið ákváðum við að búa til sérhæfða blöndu sem gæti virkað gegn þynnku. Við fórum í samstarf við efnasérfræðinga í Þýskalandi og næringarfræðinga á Íslandi og úr varð þessi drykkur,“ útskýrir Sigurður Haukur Traustason sem rekur fyrirtækið B.Okay ásamt Björgvin Sólberg og Tómasi Þórssyni. Fyrirtækið framleiðir drykki sem eiga að draga úr timburmönnum.

Sigurður Haukur segir drykkinn ekki vera töfralausn gegn þynnku en segir hann innihalda vatnsleysanleg vítamín, einstök steinefni, aminósýrur og önnur efni sem tapast úr líkamanum eftir áfengisneyslu. „Við fengum 250 manns til að prófa drykkinn síðasta sumar og viðbrögðin voru það góð að við ákváðum að halda vinnunni áfram. Byrjunin lofar mjög góðu og við teljum okkur vera með frábæra og holla vöru.“

Fjöldi húsráða eru til gegn þynnku og lumaði Sigurður Haukur á einu slíku áður en B.Okay leit dagsins ljós. „Maður keypti oft sterkar B-vítamín töflur til að taka inn. Svo hefur maður heyrt allskonar þynnkuráð í gegnum tíðina; taka inn Treo, borða sveittan hamborgara og drekka sportdrykki eða vatn. Af þessu var vatn besta þynnkuráðið,“ segir hann.

B.Okay verður fáanlegt í verslunum 10-11 frá og með miðjum maí. „Við byrjum á þessu og sjáum svo hvað setur. Við viljum heyra hvað fólki finnst um vöruna og halda áfram að þróa hana og bæta. Við sem komum að þessu erum draumóramenn og því ekki útilokað að við reynum við erlenda markaði síðar.“ sara@frettabladid.is