Innlent

Húsaleiga yrði allt að 43% lægri

Stígur Helgason skrifar
Félagslegar leiguíbúðir í Reykjavík yrðu að meðaltali 43 prósentum ódýrari en leiguverð á markaði nú.
Félagslegar leiguíbúðir í Reykjavík yrðu að meðaltali 43 prósentum ódýrari en leiguverð á markaði nú. Fréttablaðið/vilhelm

Hægt yrði að leigja 100 fermetra íbúð á höfuðborgarsvæðinu á tæpar 88 þúsund krónur á mánuði ef hið opinbera byði upp á félagslegt leiguhúsnæði að danskri fyrirmynd. Þetta segir Alþýðusamband Íslands, sem kynnti í gær hugmyndir sínar um upptöku sambærilegs kerfis hér á landi.

Danska kerfið gengur þannig fyrir sig að íbúarnir reiða fram tvö prósent af kostnaði húsnæðisins í upphafi og fá þau svo endurgreidd þegar þeir flytja út. Í ímynduðu dæmi ASÍ um hina dæmigerðu 100 fermetra íbúð á höfuðborgarsvæðinu yrði það framlag rétt tæp hálf milljón.

Yrði dönsku fyrirmyndinni fylgt væri leigan í hinu félagslega húsnæðiskerfi 29 til 43 prósentum lægri en leiguverð á markaði í dag, samkvæmt útreikningum ASÍ. Munurinn yrði mestur í Reykjavík og annars staðar á höfuðborgarsvæðinu.

Í skýrslu ASÍ segir að mikilvægt sé að tryggja nægt framboð af félagslegu húsnæði fyrir tekjulágar fjölskyldur og koma jafnframt í veg fyrir stéttskipt íbúamynstur.

Þá segir í skýrslunni að danska leiðin sé heppileg, þar sem hún verji leigjendur fyrir utanaðkomandi hækkunum á húsaleigu, svo sem vegna vaxtahækkana eða breytinga á fasteignaverði.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.