Árið 2013 byrjar ekki vel hjá Casillas

Árið 2013 byrjar ekki vel hjá spænska landsliðsmarkverðinum Iker Casillas. Fyrst setti Jose Mourinho hann á varamannabekkinn hjá Real Madrid og á miðvikudaginn varð hann síðan fyrir því að handarbrotna í bikarleik á móti Valencia.

Iker Casillas fór í aðgerð í gær á vinstri hendi og gæti verið frá í allt að tólf vikur á meðan hann er að ná sér.

„Aðgerðin gekk vel," sagði læknirinn Miguel Del Cerro við spænska blaðamenn. „Endurhæfingin gæti tekið á bilinu átta til tólf vikur. Það er betra að sjá til hvernig gengur og bíða með að gefa upp nákvæmari tímasetningar," sagði Del Cerro.

Casillas meiddist í leiknum á móti Valencia þegar liðsfélagi hans Alvaro Arbeloa sparkaði óvart í hendi hans þegar Arbeloa ætlaði að hreinsa boltann frá.

Casillas missir líklega að báðum undanúrslitaleikjum spænska bikarsins á móti Barcelona sem og leikjum liðsins í 16 liða úrslitum Meistaradeildarinnar á móti Manchester United.

Real Madrid er búið að bregðast við þessum slæmu fréttum því félagið keypti í gær hinn 31 árs gamla Diego López frá Sevilla fyrir 4,5 milljónir evra. López var áður í herbúðum Real og talaði um það að það væri gott að komast heim aftur en frægastur er hann fyrir frammistöðu sína með Villarreal frá 2007 til 2012.