Yngri Curry bróðirinn líka til Warriors

Seth Curry, yngri bróðir Stephen Curry stærstu stjörnu Golden State Warriors í NBA körfuboltanum fær tækifæri til að vinna sér inn samning hjá Warriors nú í haust.

Seth Curry var ekki valinn í nýliðavalinu í vor en hann lék áður með Duke háskólanum. Hann fær tækifæri til að vinna sér inn samning hjá liðið bróður síns þegar æfingabúðir hefjast seint í september.

Curry var meiddur á hægri fæti í aðdraganda nýliðavalsins og náði því ekki að vekja á sér athygli en hann skoraði 17,5 stig á síðasta tímabili sínu með Duke þar sem hann hitti úr 46,5% skota sinna.

Það verður ekki hlaupið að því að fá samning hjá Warriors þar sem liðið er með mjög vel mannað lið og nánast fullskipaðann leikmannahóp. Fái Curry yngri ekki samning getur hann reynt fyrir sér í þróunardeild NBA með Santa Cruz Warriors.