Chris Paul hyggst framlengja við Clippers

Talið er að leikstjórnandinn Chris Paul muni semja við NBA-lið Los Angeles Clippers næsta sumar þegar hann verður samningslaus. Paul leikur með Clippers sem leikið hefur mjög vel í vetur.

Clippers vann 17 sigra í röð á tímabilinu en hefur átt í vandræðum að undanförnu þar sem Paul hefur átt við meiðsli að stríða.

Heimildarmaður ESPN sem þekkir vel til segir 99,5 prósent líkur á að Chris Paul semji við Clippers í sumar en telja má líklegt að öll lið sem eiga rúm undir launaþakinu myndu vilja semja við þennan besta leikstjórnanda deildarinnar.

Paul hafnaði því að framlengja samning sinn við félagið í sumar þegar félagið bauð 60 milljónir dala fyrir þrjú ár.

Hann hafnaði samningnum þar sem hann getur samið til fimm ára í sumar.

Paul hefur lengi verið orðaður við New York Knicks en Paul líður vel í Los Angeles og ólíklegt að hann fari austur.

Paul er 27 ára gamall. Hann hefur skorað 16,3 stig að meðaltali í leik og gefið 9,5 stoðsendingar í leik. Clippers hefur tapað sex af 12 leikjum sem Paul hefur misst af vegna meiðsla og ljóst að áframhaldandi velgengni liðsins er háð því hvað Paul gerir næsta sumar.