Spiluðum frábærlega í leikjum sem skiptu engu máli

Íslenska körfuboltalandsliðið tapaði stórt fyrir Búlgaríu í fyrsta leik liðsins í undankeppni EM 2015, en leikurinn fór fram ytra á sunnudaginn. Búlgarir unnu 29 stiga heimasigur, 59-88, og stigu með honum risaskref í átt að sigri í riðlinum. Lykilmenn íslenska liðsins lentu í miklum villuvandræðum og íslenska liðið mátti sín mikils á móti stóru mönnum búlgarska liðsins. Ísland mætir Rúmeníu annað kvöld.

„Þetta voru bara mikil vonbrigði og við vorum langt frá því að spila eins og við höfum verið að gera í sumar,“ sagði Hlynur Bæringsson, fyrirliði íslenska landsliðsins, í samtali við Fréttablaðið í gær.

„Þetta var klárlega okkar versti leikur í sumar og mjög slæm tímasetning til að leika svona illa. Búlgaría er í sjálfu sér mun sterkari körfuboltaþjóð en við en munurinn á ekki að vera svona mikill. Þetta er í raun sterkasta þjóðin í allri undankeppninni sem við erum að taka þátt í.“

Ísland stóð sig vel á sterku fjögurra landa móti í sumar sem fram fór í Kína og hefur verið mikill uppgangur í leik liðsins undanfarnar vikur.

„Þetta gerir okkar verkefni mjög erfitt og við þurfum að treysta á aðra en okkur sjálfa í þessari undankeppni. Liðið var að spila frábærlega fyrr í sumar en það var í leikjum sem skipta engu máli, sem gerir þetta enn meira svekkjandi. Liðið virðist hafa toppað á röngum tíma. Við ætlum okkur samt sem áður að klára Rúmenana á miðvikdaginn og koma svo heim til Íslands.“