Valskonur í úrslitaleikinn í Lengjubikarnum

Valur tryggði sér sæti í úrslitaleik Lengjubikars kvenna í körfubolta eftir 84-74 stiga útisigur á Grindavík í Röstinni í kvöld en þetta var hreinn úrslitaleikur um sigur í riðlinum og þar með sæti í úrslitaleiknum á móti Haukum á sunnudaginn kemur.

Jaleesa Butler var með 23 stig og 14 fráköst fyrir Val, Kristrún Sigurjónsdóttir skoraði 18 stig, tók 9 fráköst og gaf 4 stoðsendingar og Ragnar Margrét Brynjarsdóttir var með 15 stig. Pálína Gunnlaugsdóttir var með 28 stig og 10 fráköst fyrir Grindavík og Lauren Oosdyke skoraði 16 stig. Landsliðskonan María Ben Erlingsdóttir var stigalaus á móti sínum gömlu félögum.

Valur tók strax frumkvæðið í upphafi leiks og var 25-12 yfir eftir fyrsta leikhlutann. Grindavík lagaði aðeins stöðuna í öðrum leikhlutanum en Valur var þó níu stigum yfir í hálfleik, 42-33. Valsliðið bætti við forystuna í þriðja leikhlutanum og var fjórtán stigum yfir fyrir lokaleikhlutann, 61-47. Grindavík náði að minnka muninn undir lokin en sigur Valsliðsins var aldrei í hættu.

Valskonur unnu þar með alla fjóra leiki sína í riðlinum en liðið sótti sigur bæði til Keflavíkur og Grindavíkur auk þess að vinna heimasigra á Hamar og Stjörnunni. Haukar unnu alla leiki sína í hinum riðlinum og mætast þessi tvö ósigruðu lið í úrslitaleiknum í Njarðvík um komandi helgi.

Þetta er í fyrsta sinn sem Valslið kemst í úrslitaleik í Fyrirtækjabikar KKÍ hvort sem það er í karla- eða kvennaflokki.



Grindavík-Valur 74-84 (12-25, 21-17, 14-19, 27-23)

Grindavík: Pálína Gunnlaugsdóttir 28/10 fráköst, Lauren Oosdyke 16/9 fráköst, Helga Rut Hallgrímsdóttir 9/8 fráköst, Jóhanna Rún Styrmisdóttir 7, Ingibjörg Jakobsdóttir 5, Mary Jean Lerry F. Sicat 5, Jeanne Lois Figeroa Sicat 4.

Valur: Jaleesa Butler 23/14 fráköst, Kristrún Sigurjónsdóttir 18/9 fráköst, Ragna Margrét Brynjarsdóttir 15/5 fráköst, María Björnsdóttir 8, Unnur Lára Ásgeirsdóttir 7, Guðbjörg Sverrisdóttir 7, Hallveig Jónsdóttir 4, Þórunn Bjarnadóttir 2/5 fráköst/6 stoðsendingar.