Forstjóranum sparkað með vænum starfslokasamningi

Óvænt brotthvarf Magna Arge úr forstjórastól flugfélagsins Atlantic Airways um helgina skekur nú Færeyjar. Danskur fjölmiðill fullyrðir að Landsstjórn Færeyja hafi samþykkt að Magni yrði rekinn og hann fái 150 milljóna króna starfslokasamning.

Magni Arge hefur stýrt þjóðarflugfélagi Færeyinga undanfarin átján ár en jafnframt verið einn helsti áhrifamaður færeysks atvinnulífs, meðal annars formaður samtaka olíuiðnaðarins. Hann hafði forystu fyrir kaupum Færeyinga á þremur Airbus A319 þotum en samhliða var ráðist í stækkun flugvallarins í Vogum og byggingu nýrrar flugstöðvar.

Á sunnudag fengu Færeyingar þau óvæntu tíðindi að Magni væri hættur, og sagt að stjórn félagsins og hann hefðu komist að samkomulagi um starfslok. Danska ferðatímaritið Travel People sagði hins vegar í netmiðli sínum að Magni hafi verið rekinn á laugardagskvöld, brotthvarf hans hafi verið dramatískt og gert með samþykki Landsstjórnar Færeyja, sem fer með 65 prósenta hlut í flugfélaginu.

Brottrekstur forstjórans er meðal annars rakinn til árekstra milli hans og stjórnarformanns. Sagt er að eitt af fyrstu verkefnum nýs forstjóra verði að losa sig við að minnsta kosti eina af nýju þotunum. Fullyrðir danska blaðið að Magni fái sjö milljóna starfslokasamning, jafnvirði 150 milljóna íslenskra króna, - aðrar fréttir segja að hann fái helmingi minna. Stjórnarformaðurinn hefur nú brugðist við þessum fréttum og sagt að Magni fái tvenn árslaun greidd, en vill vegna trúnaðar ekki greina nánar frá starfslokasamningnum.

Magni Arge er velþekktur í íslenska flug- og ferðageiranum, og í fyrra fór hann þess á leit að fá að nota nýju þoturnar í áætlunarflugi til Reykjavíkurflugvallar. Í vor skýrði hann frá því í viðtali á Stöð 2 að hann hefði ekkert svar fengið frá íslenskum yfirvöldum og yrði hugsanlega að flytja Færeyjaflugið til Keflavíkur.