Góður árangur í minnkun eyðslu

Minnkaði um 16% milli áranna 2011 og 2012.

Eldsneytiseyðsla bíla fer sílækkandi og svo virðist sem aldrei hafi verið tekin stærri skref í þá átt en í fyrra. Tölur frá Bandaríkjunum herma að edsneytiseyðsla nýrra bíla hafi minnkað um 16% milli ára, þ.e. frá 2011 til 2012.

Ekki hefur svo mikill munur mælst milli ára frá því árið 1975. Þau bílamerki sem fremst fara í flokki þessarar lækkunar eru Honda, Volkswagen og Mazda. Hyundai og Kia voru undanskilin í útreikningum vegna þeirrar rannsóknar sem bílar þeirra gangast undir vegna ranglega uppgefinnar eyðslu. Þó má búast við að bílar þeirra hefðu náð hátt á lista þeirra sem minnkað hafa eyðslu mest.

Næsti stóri hjallur sem bílaframleiðendur þurfa að mæta frá hendi yfirvalda verður árið 2016, en settar hafa verið fram kröfur um eyðslu bíla sem framleiddir verða þá sem mörgum bílaframleiðendum gæti reynst örðugt að ná. Þó eru 25% þeirra bíla sem framleiddir eru í dag búnir að ná þeim kröfum.