Undarlegur hvítur litur í Kópavogslæknum - lögreglan rannsakar málið

„Ég tók þessar myndir klukkan eitt í dag, ég veit ekki af hverju hann er svona hvítur,“ segir íbúi í grennd við lækinn í Kópavogi sem tók meðfylgjandi myndir af Kópavogslæknum í dag en þar sést glögglega hinn dularfulli hvíti litur sem hefur verið viðvarandi í læknum í gær og í dag.

Fréttastofa RÚV fjallaði meðal annars um málið í kvöldfréttum sínum, þar var rætt við varðstjóra lögreglunnar en málið er í rannsókn. Engin skýring hefur fengist á litnum en í fyrstu var talið að hann mætti rekja til mengunar í bensínstöð. Það reyndist þó ekki vera rétt.

Og íbúar í nágrenninu velta fyrir sér hvort það þurfi ekki að sinna svæðinu betur, ekki síst í ljósi hugmynda Framsóknarflokksins í Kópavogi, sem fékk samþykkta tillögu á dögunum þar sem skoðað verði hvort sleppa eigi eldisfisk í lækinn. Ómar Stefánsson, bæjarfulltrúi Kópavogs, sagði þá að tilgangurinn væri helst sá að breyta ímynd læksins, sem hingað til hefur verið kallaður „skítalækurinn“. Það er ljóst að þessi sérkennilega mengun hjálpar ekki í baráttunni.

Sjálfur segist íbúinn, sem vildi ekki láta nafn síns getið í fréttinni, ganga daglega niður að læknum. Hann segir umgengni í kringum svæðið einnig til skammar. En telur hann að eldisfiskurinn geti lifað í ánni?

„Ég held að það þurfi þá að vera ansi harðgerður fiskur,“ svarar hann.

Lögreglan rannsakar enn hvar upptök litarins megi finna.