Johnson setti 29 stig í einum leikhluta og jafnaði met | Myndband

LeBron James virtist hafa meitt sig á ökkla og yfirgaf völlinn í þriðja leikhluta. Kappinn sneri aftur í fjórða leikhluta og lauk leik með 30 stig í sigri Miami Heat á Utah Jazz.

Meistarar Miami unnu 117-94 sigur og hafa unnið fjóra af síðustu fimm. Illa gengur hjá strákunum úr mormónaborginni sem hafa tapað sex af síðustu átta leikjum.

Joe Johnson var í banastuði og setti 37 stig í 130-94 sigri Brooklyn Nets á Philadelphia 76ers. Johnson setti niður tíu þriggja stiga skot sem er persónulegt met.

Johnson fór hamförum í þriðja leikhluta þegar hann setti 29 stig þar af átta þriggja stiga körfur. Jafnaði hann met deildarninar í þriggja stiga körfum í einum leikhluta. Sýninguna hjá Johnson má sjá hér að neðan.

Leikur Los Angeles Lakers hrundi í þriðja leikhluta í 114-100 tapi gegn Atlanta Hawks. Haukarnir unnu leikhlutann 35-19 og lögðu grunninn að sigrinum.

Um fimmta leik Kobe Bryant eftir meiðslin var að ræða. Kappinn hitti illa og tapaði boltanum fimm sinnum. Stigin urðu átta og stoðsendingarnar sex.

Úrslit næturinnar

Indiana Pacers 96-101 Detroit Pistons

Atlanta Hawks 114-100 Los Angeles Lakers

Boston Celtics 101-97 Minnesota Timberwolves

Brooklyn Nets 130-94 Philadelphia 76ers

Miami Heat 117-94 Utah Jazz

New York Knicks 101-102 Washington Wizards

Chicago Bulls 82-83 Orlando Magic

Los Angeles Clippers 115-92 San Antonio Spurs