Jóhannes ekki líklegur til þess að ógna stöðu Haga

Bæði greiningadeildir Arion banka og Íslandsbanka telja að boðuð samkeppni Jóhannesar Jónssonar, oft kenndur við Bónus, eigi ekki eftir að ógna Högum með afgerandi hætti. Þetta kemur fram í greiningum bankanna sem unnar voru fyrir fagfjárfesta eingöngu og Vísir hefur undir höndum.

Jóhannes boðaði fyrr í sumar að hann hygðist opna lágvöruverslanir í anda Bónus í samstarfi við Iceland Foods og forstjórann Malcom Walker. Eins og kunnugt er þá var Jóhannes ásamt fjölskyldu aðaleigandi Haga áður en Arion banki tók félagið yfir og seldi aftur.

Í mati greiningadeildar Íslandsbanka segir: „Ef af verður munu þessar verslanir líklega njóta kaupendarstyrks Iceland Foods og geta boðið upp á úrval frystra vara á hagstæðu verði en meginstyrkur Iceland verslananna liggur í frystivörum. Vægi innfluttra vara er hins vegar aðeins um þriðjungur af dagvöru sem seld er í dagvöruverslunum og þeir vöruflokkar sem vega þyngst í innkaupakörfu landsmanna eru innlendar landbúnaðar- og fiskafurðir eða tæplega 40% af seldri dagvöru. Í þessum vöruflokkum og öðrum innlendum vöruflokkum verður samkeppnin við Haga erfið."

Undir þetta tekur greiningadeild Arion banka. Þar segir að um 70% af seldri dagvöru sé innlend landbúnaðar- eða iðnaðarframleiðsla.

Þannig segir í matinu: „Við sjáum neytendur ekki alveg flykkjast úr verslunum Bónus yfir í verslanir Iceland Foods, Hagar eru t.d. aðilar að AMS innkaupabandalaginu og eru með einkarétt á Euro Shopper-vörum á Íslandi í gegnum þá aðild en þessar vörur eru á hagstæðu verði. Þó má benda á opnun Sportsdirect í Smáragarði í þessu samhengi en sú verslun hefur eflaust tekið spón úr aski t.d. Útilífs sem er í eigu Haga. Neytendur leita jú oftast í lægsta verðið."

Greiningadeildin útilokar þó ekki óvæntar breytingar á neyslumynstri Íslendinga. Þannig segir í matinu: „Það neyslumynstur gæti þó breyst fari neytendur að lifa á frosnum smalabökum."