Priyanka komin með dvalarleyfi: "Það skín sól í hjarta mínu"

Priyanka Thapa hefur fengið dvalarleyfi hér á landi af mannúaðarástæðum en eftir að henni var synjað um dvalarleyfi fyrir um ári síðan var málið tekið upp aftur. „Draumar rætast eftir allt saman," segir Priyanka á Facebook-síðu sinni.

Priyanka er 24 ára Nepali sem stóð frami fyrir því að þurfa að fara aftur heim til Nepals og giftast fertugum manni, sem hún hefur aldrei hitt, til að bjarga fjölskyldu sinni frá sárri fátækt. Í viðtali við Fréttablaðið árið 2010 sagði hún að lífi sínu væri hreinlega lokið ef hún færi aftur heim. „Þar bíða mín gamlir karlar og ömurlegar aðstæður - í raun bara þrældómur," sagði hún í viðtalinu.

Útlendingastofnun úrskurðaði í apríl í fyrra að hún uppfyllti ekki skilyrði um dvalarleyfi á grundvelli mannúaðarsjónarmiða. Priyanka sagðist hafa grátið þegar hún fékk synjunina.

Nú rúmlega einu ári síðar hefur Útlendingastofnun hinsvegar úrskurðað að hún fái hér dvalarleyfi. Málið var tekið upp aftur eftir mikinn þrýsting, meðal annars frá innanríkisráðherra.

Á Facebook-síðu sinni segir Priyanka að hún sé í skýjunum og ótrúlega hamingjusöm. „Ef maður reynir sitt besta, er jákvæður og brosir framan í lífið þrátt fyrir erfiðleika sem verða á vegi manns þá getur maður sigrast á ótrúlegustu hlutum. Í dag er ég svo hamingjusöm," segir hún meðal annars.

„Það hefur skinið sól í hjarta mínu í allan dag og ég hef mikla og góða von um mína framtíð loksins eftir þessa gríðarlega erfiðu bið s.l. eitt og hálft ár, stanslaust í von og ótta um hvert mitt líf er að fara. Mér gengur vel í skólanum, ég er umkringd góðum vinum og hef bjarta von um framtíðina. Um daginn sótti ég um ríkisborgara rétt til Alsherjarnefndar sem verður unnið úr núna í haust. Mín heitasta ósk er að verða hjálpsamur, vel menntaður og sterkur íslendingur sem lifandi góðu lífi í sátt vil allt og alla."

Facebook-síðan til stuðning Priyönku.