Töpuðu hátt í 250 milljörðum á Baugi og Exista og félögum tengdum þeim

Tap lífeyrissjóðanna vegna Baugs Group hf., sem nú er í slitameðferð, er áætlað 4,8 milljarðar króna. Þetta kom fram á blaðamannafundi rannsóknarnefndar um starfsemi lífeyrissjóðanna fyrir hrun, sem haldinn er á Grand Hóteli. Ef félög tengd Baugi eru tekin með er tapið um 77 milljarðar króna.

Eins og kom fram fyrr í dag nam tap lífeyrissjóðanna vegna Exista og tengdra aðila, 170,9 milljörðum króna. Þannig töpuðu lífeyrissjóðirnir hátt í 250 milljörðum á þessum tveimur stóru viðskiptablokkum í viðskiptalífinu.

Heildartap lífeyrissjóðanna 2008 til 2010 er áætlað 479 milljarðar króna.

Hrafn Bragason, fyrrum Hæstaréttardómari, sagði í erindi sínu að lífeyrissjóðirnir hafi í einhverjum tilvikum staðið í fjárfestingum sem tæplega voru löglegir. Þá hafi engu skipt hvort FME hafi gagnrýnt þá gjörninga.