Fjölskylduvænn bær í miklum blóma

Í ársreikningi fyrir árið 2011 kemur fram að rekstur Garðabæjar var jákvæður um 352 milljónir króna og að hann gekk vel á öllum sviðum á árinu. Bærinn er í miklum blóma um þessar mundir. Bæði er fjárhagsstaðan traust og íbúarnir almennt ánægðir með þjónustu sveitarfélagsins og sitt nánasta umhverfi. Nýbirtur ársreikningur og viðhorfskannanir bera því glöggt vitni. Þessi niðurstaða er sérlega ánægjuleg, ekki síst í ljósi erfiðs árferðis undanfarinna missera.

Ein ástæða þess að rekstrarafgangur ársins 2011 er meiri en gert var ráð fyrir er fjölgun íbúa umfram spár. Garðbæingum fjölgaði um 3,4% á árinu. Þessi fjölgun ein og sér er til marks um að eftirsóknarvert sé að búa í Garðabæ en sem fyrr segir bera viðhorfskannanir að sama brunni. Þá eru álögur á íbúa lágar. Útsvar er til að mynda lægra í Garðabæ en í öðrum sveitarfélögum á höfuðborgarsvæðinu og með því lægsta sem gerist á landinu.

Nýr leikskóli og hjúkrunarheimili

Í Garðabæ hafa framkvæmdir og uppbygging þjónustustofnana haldið áfram, þrátt fyrir erfitt efnahagsástand. Nýr leikskóli tók til starfa í nýju hverfi, Akrahverfinu, í janúar síðastliðnum. Með tilkomu hans er tryggt að bærinn geti áfram boðið öllum börnum leikskólavist sem eru orðin 18 mánaða þegar skólaárið hefst að hausti. Meginþungi framkvæmdanna var á árinu 2011. Engin lán voru tekin til að byggja leikskólann sem bæjarfélagið á því skuldlaust. Á árinu héldu einnig áfram framkvæmdir við nýtt hjúkrunarheimili fyrir aldraða sem verið er að reisa í Sjálandshverfi. Þangað mun starfsemi hjúkrunarheimilisins Holtsbúðar, sem nú er staðsett á Vífilsstöðum, flytja í byrjun næsta árs. Húsið verður alls 4 hæðir, um 6.000 fermetrar og áætlaður kostnaður er 1,9 milljarðar króna sem er fjármagnað með útgáfu skuldabréfa. Bæjarsjóður fær 85% þeirrar fjármögnunar endurgreidd frá ríkinu í formi húsaleigu á 20 árum.

Gott skólastarf skilar árangri

Allt frá því að sveitarfélögin tóku við rekstri grunnskólanna hefur metnaður bæjarstjórnar staðið til þess að í bænum sé grunnskólastarf í fremstu röð. Í bænum starfa sex grunnskólar, fjórir þeirra eru reknir af bænum og tveir af einkaaðilum. Börn í Garðabæ eiga aðgang að öllum þessum skólum án þess að greiða skólagjöld og því geta foreldrar valið þann skóla sem þeir telja að henti sínu barni best. Á árinu 2011 uppskáru grunnskólar bæjarins ríkulega. Niðurstöður PISA-könnunar frá 2009 sem voru kynntar á árinu sýndu að nemendur í Garðabæ standa sig afburða vel. Árangur þeirra var marktækt betri en meðaltal Íslands í öllum þáttum, þ.e. lesskilningi, læsi á stærðfræði og læsi í náttúrufræði, og var sambærilegur við árangur nemenda í Finnlandi sem oftast hafa komið best út úr þessari könnun. Nýleg skýrsla leiddi ennfremur í ljós að í Garðabæ er ekki marktækur munur á lesskilningi drengja og stúlkna. Á árinu fékk Sjálandsskóli afhent Íslensku menntaverðlaunin og er það mikill heiður fyrir þennan unga skóla sem hefur verið í fararbroddi á mörgum sviðum m.a. hvað varðar einstaklingsmiðað nám, fjölbreytta, sveigjanlega og lýðræðislega kennsluhætti og útikennslu. Við sama tækifæri fékk Gunnlaugur Sigurðsson, fyrrverandi skólastjóri Garðaskóla, verðlaun fyrir merkt ævistarf.

Við viljum skara fram úr

Það er mikil áskorun fólgin í því að reka gott sveitarfélag í þágu íbúa. Í Garðabæ tökumst við óhrædd á við þessa áskorun. Við leitumst við að gera það af ábyrgð og auðmýkt í senn. Við viljum skara fram úr og erum óbangin við að reyna nýjar leiðir að því markmiði. Við leggjum áherslu á að fara ábyrgum höndum um sameiginlega sjóði bæjarbúa í markvissri viðleitni til að standa undir kröfum þeirra um framúrskarandi rekstur og þjónustu. Árið 2011 var okkur heilladrjúgt og útlitið er gott í fyrirsjáanlegri framtíð. Ég vil þakka stjórnendum og starfsfólki Garðabæjar sérstaklega fyrir þennan góða árangur og bæjarbúum öllum fyrir gott samstarf um leið og ég óska lesendum öllum gleðiríks sumars.