Einn dæmdur fyrir að brenna Krýsuvíkurkirkju

Héraðsdómur Reykjavíkur hefur dæmt rúmlega tvítugan mann í eins árs fangelsi, skilorðsbundið til tveggja ára, fyrir að leggja eld að Krýsuvíkurkirkju í janúar 2010 með þeim afleiðingum að hún brann til ösku. Dómurinn féll um miðjan febrúar en hefur ekki verið birtur opinberlega.

Einn rúmlega tvítugur maður og tvær tæplega tvítugar stúlkur eru hins vegar sýknuð af aðild að málinu. Fólkið viðurkenndi allt fyrir dómi að hafa farið að Krýsuvíkurkirkju umrætt kvöld og kannaðist við að kviknað hefði í kirkjunni. Allt skellti það skuldinni á hinn dæmda, sem játaði að hafa hellt úr bensínbrúsa inni í kirkjunni og reynt að kveikja í. Hann sagði hins vegar að tilraunir sínar hefðu allar verið mislukkaðar og að endingu hafi það verið hinn maðurinn sem kveikti eldinn.

Dómurinn hafnar þessu og telur ekkert sanna að hinn maðurinn og stúlkurnar tvær hafi átt þátt í íkveikjunni. Hinn dæmdi hefur áður komist í kast við lögin. Hann er haldinn vægri þroskaskerðingu sem þó hefur ekki áhrif á sakhæfi hans. Það er virt honum til refsilækkunar að hann hafi að mestu leyti játað sök í málinu.

Krýsuvíkurkirkja var á fornminjaskrá og er maðurinn dæmdur til að greiða Þjóðminjasafninu 7,3 milljónir í skaðabætur. Til stendur að endurbyggja kirkjuna. - sh