Fréttaskýring: Ótrúleg viðskipti samfélagsmiðla

Fyrir tæplega tveimur árum stofnaði Kevin Systrom, ásamt fleiri minni fjárfestum, fyrirtæki í San Francisco sem sendi fljótlega frá sér „app", eða smáforrit, fyrir snjallsíma sem nú hefur breytt honum í milljarðamæring. Facebook hefur keypt hugbúnaðinn, Instagram, sem gerir notendum mögulegt að sýna myndir á samfélagsmiðlaformi, á einn milljarð dollara, tæplega 130 milljarða króna. Í fréttaskýringum í stærstu fjölmiðlum Bandaríkjanna í dag er talað um viðskiptin sem einhver þau ótrúlegustu sem nokkurn tímann hafa átt sér stað í hugbúnaðargeiranum. Ástæðan er ekki sú að Instagram sé óvandaður hugbúnaður, alls ekki. Þvert á móti er hann almennt álitinn sniðugur og þægilegur, og hefur á örskömmum tíma stækkað notendahóp sinn upp í 30 milljónir manna um allan heim.

Engar tekjur

Það sem gerir viðskiptin ótrúleg er að Instagram er örlítið fyrirtæki, með samtals 10 full stöðugildi og 13 starfsmenn. Hvert stöðugildi er því metið á um 100 milljónir dollara. Fyrirtækið hefur aldrei haft neinar tekjur og var ekki komið svo langt að velta því fyrir sér hvernig það gat haft tekjur, samkvæmt frásögn Wall Street Journal í dag. Samt sem áður slógust samfélagsmiðlarisarnir, Facebook, Google+ og Twitter, um fyrirtækið. Eigendur Instagram voru því í kjörstöðu við að búa til verðsamkeppni til þess að fá sem hæst verð og eru nú orðnir milljarðamæringar í dollurum talið. Verðmiðinn var álitinn vera um 500 milljónir dollara fyrir nokkrum vikum, en varð á endanum tvöfalt hærri.

En af hverju?

Instagram er gríðarlega ört vaxandi samfélagsmiðlunarform og það er það sem Mark Zuckerberg, forstjóri og stærsti eigandi Facebook, horfir fyrst og fremst til. Með því að eignast Instagram kemst Facebook í enn sterkari stöðu á snjallsímamarkaði, en þar hefur notendum Facebook ekki fjölgað eins hratt og margir höfðu reiknað með.

Netbólulærdómur

Kaupin eru einnig sögð vera mikilvæg fyrir þær sakir að fjárfestar velta því fyrir sér, hvort Facebook sé með raunverulegan möguleika á því að verða auglýsingarisi framtíðarinnar, í ljósi ótrúlega ítarlegra upplýsinga um notendur, s.s. aldur, kyn, menntun og áhugamál, eða hvort fyrirtækið sé hreinlega alltof hátt verðlagt. Framundan er nefnilega skráning félagsins á markað.

Enn sem komið er hafa efasemdaraddir um möguleika Facebook ekki verið háværar en ýmis fagatímarit hafa þó spurt að því, hvort hugbúnaðargeirinn hafi ekkert lært frá netbólunni í kringum 2000. En þá leitaði fjármagn í gríðarlega miklu magni í nýjungar án þess að fjárfestar veltu því nægilega vel fyrir sér hvernig mögulegt væri að græða á öllu saman. Margir stilla Facebook og Google upp sem andstæðingum hvað þetta snertir, enda Google stærsta fyrirtæki heims sem byggir afkomu sína á auglýsingatekjum.

Facebook er þó rekið með góðum hagnaði nú um stundir, og er með árlegar árstekjur upp á 3,7 milljarða dollara, liðlega 500 milljarða króna, og um 800 milljónir notenda. Langsamlega fjölmennasta þjóð heims, Kína, er þó ekki mikið á Facebook, nema þá með lögbrotum, en þar er samfélagsmiðillinn bannaður, eins og svo margt annað.