Vill reglur um aðgang allra að landsleikjum

„Mér finnst eins og mörgum öðrum að það sé alls óviðunandi þegar stórviðburðir eiga sér stað og eru í beinum útsendingum, hvort sem það er menning, listir eða íþróttaviðburðir, þá skuli sú staða koma upp ítrekað að það er boðið upp á þetta í læstri dagskrá," segir alþingismaðurinn Lúðvík Geirsson, sem hefur innt Katrínu Jakobsdóttur menntamálaráðherra eftir því með skriflegri fyrirspurn á þingi hvort til standi að koma í veg fyrir þetta hvað íþróttirnar varðar.

Fyrirspurn Lúðvíks, sem lögð var fram í vikunni, snýr að landsleikjum í íþróttum. Hann spyr Katrínu um skoðun hennar á því að landsleikir í vinsælum íþróttagreinum séu stundum í læstri dagskrá og hvort bregðast megi við.

„Víða erlendis er tryggt í lögum að slíkir viðburðir skuli vera opnir. Í fjölmiðlalögunum sem voru samþykkt fyrir ári síðan er í 48. grein heimild fyrir ráðherra að setja reglugerð og tilgreina sérstaklega þá viðburði sem eigi að vera í opinni dagskrá," segir Lúðvík.

„Ég finn að það eru mjög sterk viðbrögð. Fólk hefur auðvitað sterkar skoðanir á þessu," segir hann. Hann nefnir að Stöð 2 hafi keypt sýningarrétt að mótum þar sem Íslendingar eru þátttakendur og sýnt leikina í lokaðri dagskrá.

„Það er eitt að geta sótt sér tekjur í kostun og auglýsingasölu við svona vinsæla viðburði, annað er að hafa dagskrána lokaða og það geti enginn horft nema hann kaupi sér sérstaka áskrift," segir Lúðvík.

Ari Edwald, forstjóri 365 miðla, segir að hugmyndir sem þessar slái hann mjög illa. „Ég teldi algjörlega fráleitt af menntamálaráðherra að beita þessari lagaheimild við þær aðstæður sem hér eru á sjónvarpsmarkaði," segir hann.

Ari bendir á að hér sé ríkisfjölmiðill á auglýsingamarkaði, sem sé ólíkt því sem tíðkist í nágrannalöndum okkar. Það séu því ósannindi og blekkingar sem haldið hafi verið fram af fulltrúum menntamálaráðuneytisins að með slíkri reglusetningu hér yrði ástandið fært í sama horf og þar. Á íslenska markaðnum mundu reglur sem þessar hreinlega útiloka einkafyrirtæki frá því að sýna frá viðburðum af þessu tagi.

„Mér finnst þessi fyrirspurn og þau viðhorf sem Lúðvík Geirsson hefur verið að setja fram afskaplega kaldar kveðjur frá fyrrverandi formanni blaðamannafélagsins til stærsta vinnustaðar virkra félagsmanna í því félagi, því að þetta væri auðvitað mikil atlaga að okkar fyrirtæki," bætir Ari við.

stigur@frettabladid.is