Gylfi Þór Sigurðsson, leikmaður Swansea City, hefur verið valinn besti leikmaður marsmánaðar í ensku úrvalsdeildinni en Gylfi spilaði frábærlega með nýliðunum í mars. Þetta er mikill heiður fyrir íslenska landsliðsmanninn sem er fyrsti Íslendingurinn sem hlýtur þessi verðlaun.
Það er sérstök nefnd á vegum ensku úrvalsdeildarinnar sem velur besta leikmanninn en það hefur ekkert farið framhjá neinum sem fylgjast með enska boltanum hvernig Gylfi hefur stimplað sig inn í bestu deild í heimi.
Gylfi skoraði 4 mörk í 4 leikjum í mánuðinum og hjálpaði Swansea að vinna þrjá af fjórum leikjum sínum. Mörkin hans komu í tveimur útileikjum en hann skoraði tvö mörk í bæði 2-0 sigri á Wigan og 3-0 sigri á Fulham.
Gylfi kemst í flottan hóp með því að hljóta þessi verðlaun en menn eins og David Silva, Robin van Persie, Gareth Bale og Scott Parker hafa allir hlotið þau í vetur.
Owen Coyle, stjóri Bolton var að sama skapi valinn besti stjóri mánaðarins.
Leikmenn mánaðarins í ensku úrvalsdeildinni á tímabilinu:
Ágúst Edin Džeko, Manchester City
September David Silva, Manchester City
Október Robin van Persie, Arsenal
Nóvember Scott Parker, Tottenham
Desember Demba Ba, Newcastle
Janúar Gareth Bale, Tottenham
Febrúar Peter Odemwingie, West Bromwich Albion
Mars Gylfi Þór Sigurðsson, Swansea City
Gylfi valinn besti leikmaður marsmánaðar í ensku úrvalsdeildinni
