Rektor mun ekki aðhafast í máli Ársæls Valfells

Kristín Ingólfsdóttir, rektor Háskóla Íslands, mun ekki aðhafast frekar í máli Ársæls Valfells, lektors við viðskiptafræðideild skólans, vegna aðildar hans að leka á trúnaðargögnum um Guðlaug Þór Þórðarson, alþingismann.

Gunnar Þ. Andersen, fyrrverandi forstjóri FME, er grunaður um að hafa brotið ákvæði um þagnarskyldu opinberra starfsmanna og ákvæði laga um fjármálafyrirtæki um bankaleynd með því að hlutast til um að trúnaðarupplýsingar um Guðlaug Þór Þórðarson, alþingismann, yrðu sendar frá Landsbankanum til DV. Er hann grunaður um að hafa kallað eftir upplýsingunum um Guðlaug Þór í krafti stöðu sinnar sem forstjóri FME. Málið var rannsakað af lögreglu og síðan sent til ríkissaksóknara, en engin ákvörðun hefur verið tekin um lyktir þess.

Ársæll Valfells, lektor, aðstoðaði við að koma trúnaðarupplýsingum á framfæri og sendi frá sér yfirlýsingu þar sem hann lýsti aðkomu sinni að málinu. Í kjölfarið óskaði Kristín Ingólfsdóttir, rektor HÍ, eftir skriflegri greinargerð frá Ársæli þar sem hann var beðinn um að skýra mál sitt. Ársæll hefur nú skilað þessari greinargerð.

„Það er ekkert í hans greinargerð sem gaf tilefni til formlegrar meðferðar eða aðgerða af hálfu skólans," segir Kristín í samtali við fréttastofu.

Finnst þér eðlilegt að kennarar við háskólann taki þátt í að koma á framfæri trúnaðarupplýsingum um fjárhagsmálefni einstaklinga?

„Ég get ekki, á meðan mál eru til rannsóknar, verið að tjá mig um það. Þegar málinu lýkur munum við skoða þetta ef tilefni er til. Það er ekki við hæfi að ég sé að tjá mig um mínar persónulegar skoðanir. Þetta er í rannsókn hjá þar til bærum aðilum. Ég tel að málið sé í réttum farvegi og tel ekki rétt að aðhafast neitt að svo stöddu," segir Kristín.

Ársæll vildi sjálfur ekkert tjá sig um málið og neitaði að svara spurningum fréttastofu. thorbjorn@stod2.is