Ferrari að missa þolinmæðina í málum Massa

Felipe Massa undir gríðarlegri pressu hjá Ferrari liðinu. Sú pressa hefur hins vegar aðallega verið utanað komandi en nú eru blikur á lofti um að liðið sé farið að missa þolinmæðina á slæmu gengi Brasilíumannsins.

Ferrari hefur sýnt Massa gríðarlegan skilning eftir að ökuþórinn lenti í óhappi í Ungverjalandi árið 2010. Þá fékk hann aðskotahlut í höfuðið, rotaðist og keppti ekki aftur fyrr en árið 2011.

Liðsfélagi hans, Fernando Alonso, hefur ekið stórkoslega í vor, keppt um sigur nokkrum mótum og er efstur í stigamótinu ásamt Sebastian Vettel. Massa hefur átt erfitt uppdráttar og týnst í baráttunni neðar í röðinni og er aðeins með tvö stig úr fimm mótum.

Ferrari vill að Massa nái árangri í Mónakó kappakstrinum eftir tæpar tvær vikur. Þetta eru fyrstu merki þess að Ferrari sé farið að hafa áhyggjur af getuleysi Massa. Samningur hans við liðið rennur út lok árs og margir ökumenn hafa verið orðaðir við sæti hans.

Í yfirlýsingu á vefsíðu Ferrari var tæpt á slæmum árangri Massa. "Felipe var óheppinn en við gerum ráð fyrir að hann, fremur öðrum, skipti um gír og nái árangri í Mónakó."

Það er því heitt undir sæti Massa hjá Ferrari. Kappaksturstímaritið Autosport segist hafa heimildir fyrir því að Ferrari sé nú þegar farið að meta möguleika sína, til lengri - og styttri - tíma, breytist staðan ekki.

Þeir ökumenn sem Ferrari er talið líta til eru Sergio Perez hjá Sauber, Paul di Resta og Nico Hulkenberg hjá Force India og Jerome d'Ambrosio, tilraunaökuþór Lotus. Tilkoma d'Ambrosio í umræðuna er forvitnileg en hann býr að því að vera mögulegur um leið og Ferrari kallar, án frekari skuldbindinga.