Gylfi: Full ástæða til þess að staldra við bónusa

Gylfi Magnússon, prófessor í hagfræði við viðskipta- og hagfræðideild Háskóla Íslands, segir að fara þurfi varlega þegar kemur að kaupaukakerfum í nýju bönkunum og að full ástæða sé til þess að staldra við þegar þessar hugmyndir eru ræddar í tengslum við hina endurreistu banka. „Það er rétt að staldra við þegar kemur að kaupaukakerfum í bönkunum, ekki síst þegar skattgreiðendur eru stærstu eigendur. Bónusgreiðslur og kaupaukakerfi í bönkunum fyrir hrun þeirra var ein ástæða þess hvernig fór, og ýtti undir fífldjarfa áhættu. En þrátt fyrir það, er ekki þar með sagt að öll kaupaukakerfi séu óréttlætanleg. Útfærslan er aðalatriði í þessu og þar þarf að vanda til verka," segir Gylfi.

Í samkomulagi milli nýja og gamla Landsbankans er ráð fyrir því gert að starfsmenn Landsbankans geti eignast tveggja prósenta hlut í bankanum, ef vel gengur að endurheimta eignir í tengslum við skilyrt 92 milljarða skuldabréf milli nýja og gamla bankans. Miðað við innra virði Landsbankans, þ.e. eigið fé, er virði tveggja prósenta hlutar í dag ríflega fjórir milljarðar króna. Stærsti eigandi hins endurreista Landsbanka er íslenska ríkið með 81 prósent hlut en kröfuhafar gamla bankans eiga um 19 prósent hlut.

Eins og greint hefur verið frá í Fréttablaðinu og Stöð 2 undanfarnar vikur þá liggur endanleg útfærsla á kaupaukakerfi Landsbankans ekki fyrir. Nýsamþykktar reglur Fjármálaeftirlitsins gera þó ráð fyrir að starfsmenn í innri endurskoðun, áhættustýringu og regluvörslu geti ekki fengið kaupauka, auk þess sem kaupaauki má ekki vera hærri árlega en sem nemur fjórðungi af heildarlaunum á ári án kaupauka.