Bónusar eins og fyrir hrun ekki á dagskrá

Það kemur ekki til greina að hleypa kaupaukakerfinu í bönkunum af stað aftur í þeirri mynd sem það var fyrir hrun segir Steingrímur J. Sigfússon, efnahags- og viðskiptaráðherra. Hann segir áform um kaupaukakerfi í Landsbankanum til komin vegna óska kröfuhafa.

Eins og fram kom í Markaðinum, fylgiriti Fréttablaðsins, í síðustu viku munu starfsmenn Landsbankans eignast allt að tveggja prósenta hlut í bankanum þegar lokauppgjör fer fram milli bankans og þrotabús gamla Landsbankans í lok þessa árs. Með þessu er ætlunin að byggja upp kaupaukakerfi, en hluturinn er um fjögurra milljarða króna virði.

„Það kemur ekki til greina að hleypa þessu kaupaukakerfi af stað í þeim anda sem það var, enda stendur það ekki til," segir Steingrímur. Hann segir búið að taka fyrir að stjórnendum bankanna verði greiddir risabónusar tengdir skammtímagróða, svo sú hætta verði aftur til staðar að stjórnendurnir reyni að skrúfa afkomuna upp milli ársfjórðunga vegna bónusa. Hann segir að um það hafi samist við kröfuhafa gamla Landsbankans að starfsmenn nýja bankans fengju að njóta þess með kaupaukum ef vel gengi.

„Þeir voru raunar með miklu meiri kröfur í þeim efnum sem við féllumst ekki á. Að endingu náðist saman á þessum nótum, að allir starfsmenn bankans gætu fengið vissa hlutdeild í því þegar til uppgjörsins kemur milli nýja og gamla bankans," segir Steingrímur.

Steingrímur vísar til þess að Fjármálaeftirlitið (FME) hafi sett reglur um kaupauka þar sem þeim eru settar verulegar skorður, og bankarnir verði að sjálfsögðu að fara eftir þeim reglum.

„Ég er persónulega ekki mikill aðdáandi kaupauka eða bónusa yfir höfuð og deili ekki þeirri hugmyndafræði að þeir þurfi að vera," segir Steingrímur. „Að því marki sem það er þarf að setja um það mjög stífar reglur og koma í veg fyrir að vitleysan frá því fyrir hrunið geti tekið sig upp á nýjan leik. Það verður séð til þess," segir Steingrímur.

Í eigendastefnu ríkisins er kveðið á um hófsemi í launamálum hjá bönkunum, og bankanum ber að starfa í þeim anda, segir Steingrímur.

brjann@frettabladid.is