Samvinnan mikilvægari en samkeppnin

Guðjón Valur Sigurðsson hefur komið sér vel fyrir hjá Þýskalands- og Evrópumeisturum THW Kiel en þangað kom hann nú í sumar. Liðið er nokkuð breytt frá síðustu leiktíð en það er þó enn taplaust á tímabilinu. Nú síðast komu góðir sigrar gegn sterkum liðum Hamburg og Flensburg.

„Mér persónulega hefur gengið vel að aðlagast nýju liði enda er það oft auðveldara fyrir okkur hornamennina en aðra leikmenn. Við getum alltaf laumað okkur í okkar hraðaupphlaup," segir hann við Fréttablaðið. „Það er auðvitað gaman að spila með þessu liði – þetta er frábær klúbbur og mannskapurinn sömuleiðis."

Óhætt er að fullyrða að félagið hafi minnst tvo leikmenn í heimsklassa í hverri stöðu en Guðjón Valur deilir sinni stöðu með þýska landsliðsmanninum Dominik Klein.

„Ég þekki það vel að spila í liðum þar sem ríkir samkeppni í stöðum og er það ekkert óvenjulegt. Ég væri auðvitað til í að spila hverju einustu mínútu en miðað við hvað það er mikið álag í handboltanum í dag, með tilheyrandi ferðalögum, snýst þetta meira um samvinnu á milli leikmanna en samkeppni," áréttar hann.

„Heilt á litið er ég búinn að spila ívið meira en hann og ég er mjög sáttur við mína stöðu," segir Guðjón Valur.

Hann segir erfitt að neita því að Kiel sé besta lið sem hann hafi spilað með á ferlinum. „Liðið er ríkjandi Þýskalandsmeistari, bikarmeistari og Evrópumeistari og það væri erfitt fyrir mig að segja eitthvað annað. Ég hef spilað með mörgum góðum handboltamönnum um árin en í Kiel eru allir góðir. Þetta er án nokkurs vafa besta lið sem ég hef æft og spilað með."

Alfreð Gíslason er þjálfari liðsins en Guðjón Valur þekkir vel til hans, enda spilað undir hans stjórn í bæði Gummersbach og íslenska landsliðinu.

„Hann er enn sami maðurinn og sami þjálfarinn," segir Guðjón Valur. „Hann hefur úr meiru að moða núna og er með betri leikmenn í höndunum. Annars ætla ég ekki að segja of mikið jákvætt eða neikvætt um hann," segir hann sposkur á svip. „Það kemur allt í bakið á mér," bætir hann við og hlær.