Netvarnir hjá NATO efldar fyrir milljarða

Atlantshafsbandalagið ætlar að verja nærri tíu milljörðum króna í að efla netvarnir bandalagsins. Ætla að koma upp viðbragðsteymum sem aðildarríki geta kallað til sé gerð netárás. Fölsk vinabeiðni aðmíráls kom bandalaginu í bobba.

Atlantshafsbandalagið (NATO) hefur boðið út verkefni fyrir sem nemur 9,7 milljörðum króna til að efla netvarnir bandalagsins. Um er að ræða stærsta samning sem bandalagið hefur gert til að tryggja upplýsingaöryggi hjá bandalaginu og aðildarríkjum.

Með útboðinu er ætlað að styrkja netvarnarmiðstöð NATO. Miðstöðin er þegar starfandi, en henni er ætlað að starfa á fullum afköstum fyrir lok árs, og er útboðinu ætlað að tryggja það.

Miðstöðinni hefur hingað til fyrst og fremst verið ætlað að tryggja öryggi tölvukerfis bandalagsins. Fyrir árslok er ætlunin að auka áherslu á aðstoð við bandalagsríki, til dæmis með því að deila upplýsingum. Þá verða einnig sett á laggirnar sérstök viðbragðsteymi sem bandalagsríkin geta fengið aðstoð frá sé gerð alvarleg netárás.

„Almenna ályktunin sem má draga af þessu er að menn eru að leggja gríðarlega áherslu á netvarnir,“ segir Hrafnkell V. Gíslason, forstjóri Póst- og fjarskiptastofnunar.

Stofnunin starfrækir netöryggisteymi, svokallaðan CERT-hóp, en Hrafnkell segir hópinn leggja alla áherslu á borgaralegar netvarnir, ekki hernaðarlegar eins og NATO. Hópurinn horfi nú fyrst og fremst til samstarfs við Norðurlöndin, þó ekki sé hægt að útiloka samstarf við NATO í framtíðinni.

Reglulega eru gerðar netárásir á stofnanir og fyrirtæki hvar sem er í heiminum. Yfirleitt er ekkert gefið upp um slíkar árásir, þar sem stjórnendur fyrirtækja óttast að traust á fyrirtækjunum hrynji, og hlutabréfaverðið þar með, ef upplýst er um netárásir sem fyrirtækin ná ekki að verjast.

Dæmi eru um slíkar árásir á nokkur af stærstu olíu- og gasframleiðslufyrirtækjum heims nýverið. Árásirnar voru raktar til Kína. Þar sem þær áttu sér bara stað á skrifstofutíma í Peking telja sérfræðingar víst að kínversk stjórnvöld standi á bak við árásirnar.

brjann@frettabladid.is