Björgvin Páll: Þeir voru eins og brjálæðingar

Björgvin Páll Gústavsson, markvörður íslenska liðsins, sagði varnarleik Íslands í fyrri hálfleik gegn Túnis hafa verið með ólíkindum. Strákarnir höfðu betur, 32-22, eftir að hafa gert út um leikinn í fyrri hálfleiknum.

„Það var frábært svona snemma dags að sjá okkar menn taka svona ótrúlega vel á þessum gaurum. Þeir voru bara með dýr fyrir framan sig," sagði Björgvin Páll sem átti frábæran fyrri hálfleik eins og allir leikmenn íslenska liðsins.

„Mitt verkefni var að halda mér heitum fyrstu mínúturnar því ég fékk bara tvö skot á mig. Strákarnir stoppuðu allt sem hægt var að stoppa og voru eins og brjálæðingar fyrir framan mig."

„Þeir eiga stórt hrós skilið - hver einasti maður sem spilaði vörn í þessum fyrri hálfleik. Þetta var bara frábært og gulls ígildi fyrir mig sem markvörð að fá svona marga ókeypis bolta á mig," sagði hann. Björgvin Páll gerði þó sitt og varði til að mynda úr nokkrum dauðafæri sem og tveimur vítaskotum.

„Maður er kominn í fílinginn eftir að hafa fengið nokkra ókeypis bolta. Þá koma þessir bónusboltar með sem er mikilvægt því ég þurfti að halda mér heitum - sérstaklega þar sem fyrstu mínúturnar voru erfiðar í leiknum."

„Það var svo sérstaklega gott að halda áfram að byggja upp forystu og hleypa þeim ekki aftur inn í leikinn áður en flautað var til hálfleiks. Það tók samt á og var ekkert auðvelt."

Það gekk á ýmsu í leiknum og leikmenn Túnis beittu stundum fólskubrögðum til að reyna að stöðva Íslendinga. „Þeir spila mjög grófan handbolta og hafa gripið misgáfulegra aðgerða. En maður svarar því bara á einn hátt - spila bara enn betur og vera brjálaður í skapinu á móti."

„Við vildum bara sýna hvað við getum og rúlla yfir þetta lið."