Stutt á milli stórleikja hjá Söru og Þóru

Þóra Björg Helgadóttir og Sara Björk Gunnarsdóttir áttu möguleika að því að vera sænskir meistarar með LdB Malmö í gær með sigri á Umeå. 1-1 jafntefli þýðir hinsvegar að LdB Malmö mætir Tyresö í hreinum úrslitaleik um sænska titilinn um næstu helgi.

Það er svo sannarlega stutt á milli stórleikja hjá Söru og Þóru. Þær tóku þátt í því að tryggja íslenska landsliðinu farseðil á Evrópumótið í Svíþjóð á fimmtudaginn og spiluðu síðan gríðarlega mikilvægan deildarleik aðeins þremur dögum síðar. Báðar léku þær í 90 mínútur í báðum leikjum.

Framundan eru síðar tveir leikir við ítalska liðið Bardolino Verona í Meistaradeildinni og svo úrslitaleikurinn um titilinn á móti Tyresö.

LdB Malmö spilar fyrri leikinn í 16 liða úrslitum Meistaradeildarinnar á móti Bardolino á miðvikudaginn, úrslitaleikinn við Tyresö á laugdaginn og svo seinni leikinn við Bardolino í vikunni á eftir.

Að loknum seinni leiknum við Bardolino eiga þær Sara og Þóra möguleika á því að vera búnar að tryggja sér sæti á EM, vinna sænska titilinn og tryggja sér sæti í átta liða úrslitum Meistaradeildarinnar og það á aðeins þrettán dögum.