Bjarni Þór Viðarsson opnaði markareikninginn hjá Silkeborg

Bjarni Þór Viðarsson kom inn á sem varamaður og skoraði þegar Silkeborg vann 2-0 sigur á SönderjyskE í dönsku úrvalsdeildinni í knattspyrnu í dag.

Allt stefndi í markalaust jafntefli á Haderslev-vellinum þegar gestirnir skoruðu tvö mörk á þremur mínútum. Marvin Pourie kom Silkeborg yfir á 86. mínútu og mínútu síðar kom Bjarni Þór Viðarsson inn á sem varamaður.

Hafnfirðingurinn var ekki lengi að láta til sín taka og tryggði gestunum tveggja marka sigur. Hallgrímur Jónasson lék allan leikinn í vörninni hjá SönderjyskE en Húsvíkingurinn hefur verið frá keppni um tíma vegna meiðsla.

Með sigrinum lyfti Silkeborg sér úr fallsæti. Liðið hefur sjö stig að loknum níu umferðum. SönderjyskE hefur tíu stig í 9. sæti deildarinnar.