Haustveiðin farin af stað í Elliðaánum

Tveir laxar komu á land í morgun í Elliðaánum. Var það fyrsta vaktin af tveggja vikna tímabili sem bætt var við áður ákveðna veiðidaga í sumar.

Aðeins er heimilt að veiða á flugu þessar tvær viðbótarvikur og er skylt að sleppa öllum laxi. Eingöngu er veitt í efri hluta ánna.

Annar laxinn sem fékkst í morgun kom á Þýska snældu í Borgarstjóraholu og hinn veiddist í Hrauninu. Með þessum tveimur löxum var sumarveiðin í Elliðaánum komin upp í 769 laxa.

Þótt veiðin síðustu vikurnar hafi verið mest á efsta svæðinu hafa fáeinir laxar skilað sér á land niður frá líka. Þannig veiddist nýgenginn lax í Sjávarfossi fyrir nokkrum dögum.

Eitthvað er enn eftir af óseldum leyfum í Elliðaárnar hjá Stangaveiðifélagi Reykjavíkur. Síðasti veiðidagurinn er 14. september. Veitt er á fjórar stangir.