Thierry Omeyer búinn að vinna 32 stóra titla á ferlinum

Það hefur löngum verið sagt í handbolta að góður markvörður getur gert gæfumuninn fyrir liðið þitt og það sannast hvergi betur en í Thierry Omeyer, markverði franska landsliðsins. Omeyer var enn á ný í fararbroddi með franska landsliðinu sem tryggði sér Ólympíugull fyrr í dag og er nú búinn að vinna 32 stóra titla á ferli sínum en alla titlarnir vann hann eftir aldarmót eða á síðustu ellefu árum.

Frakkarnir voru þarna að vinna sjötta stórmót sitt á síðustu sex árum og Thierry Omeyer hefur verið í aðalhlutverki á þeim öllum. Þá má ekki gleyma frammistöðu hans með Kiel en Kielar-liðið vann einmitt alla titla í boði á síðustu leiktíð.

Thierry Omeyer verður 36 ára í nóvember næstkomandi og er að byrja sitt síðasta tímabil með Kiel. Hann hefur spilað með liðinu frá árinu 2006 þegar hann kom þangað frá Montpellier í Frakklandi.

Ferilskráin hjá Thierry Omeyer er orðin svakaleg og til gamans má sjá hér fyrir neðan lista yfir sigurgöngu hans með sínum liðum undanfarin ellefu ár.



Stórir titlar Thierry Omeyer á ferlinum:

Með franska landsliðinu - 7 stórir titlar

Ólympíumeistari - 2 (2008 og 2012)

Heimsmeistari - 3 (2001, 2009 og 2011)

Evrópumeistari - 2 (2006 og 2010)

Með THW Kiel - 14 stórir titlar

Evrópumeistari meistaraliða - 3 (2007, 2010 og 2012)

Heimsmeistari félagsliða - 1 (2011)

Þýskur meistari - 5 (2007, 2008, 2009, 2010 og 2012)

Þýskur bikarmeistari - 5 (2007, 2008, 2009, 2011 og 2012)

Með Montpellier HB - 11 stórir titlar

Evrópumeistari meistaraliða - 1 (2003)

Franskur meistari - 5 (2002, 2003, 2004, 2005 og 2006)

Franskur bikarmeistari - 5 (2001, 2002, 2003, 2005 og 2006)