Hreiðar: Vildum klára leikinn með reisn

„Þessi leikur á ekki eftir að lifa í minningunni," sagði markvöðurinn Hreiðar Levý Guðmundsson eftir sigur Íslands á Bretlandi, 41-24, á Ólympíuleikunum í dag.

„Hvorki hjá þjóðinni né okkur leikmönnunum. Aðalmálið er að við fengum tvö stig og unnum riðilinn með fullt hús stiga. Það er það sem skiptir mestu máli."

Hreiðar neitar því ekki að það hafi verið erfitt að taka þátt í fyrri hálfleiknum en staðan að honum loknum var 18-15, Íslandi í vil. Enginn átti von á því að Bretar myndu ná að hanga í strákunum okkar svo lengi.

„Þetta var kannski pínulítið vandræðalegt hjá okkur. En málið er bara að þeir gáfu allt í þetta á meðan að við vorum á hælunum. Þá fer þetta svona og þetta er ekki í fyrsta skipti sem við lendum í vandræðum með leiki sem við ætlum að taka létt."

„Bretarnir voru mikið að tala um það í göngunum fyrir leik að þeir ætluðu að hafa gaman að þessu öllu saman og njóta stundarinnar. Þeir voru vel gíraðir upp í leikinn á meðan að við vorum bara að bíða eftir því að þessar 60 mínútur myndu bara líða hjá."

„Við vildum klára þennan leik með reisn og ekki lenda í 60 mínútna hörkuleik gegn þjóð sem er nýliði í sportinu."