Ekki sá stærsti í fjóra áratugi

110 sentímetra laxinn sem veiddist í Laxá í Aðaldal 11. júlí var ekki sá stærsti síðustu fjóra áratugi. Nokkur dæmi eru um stærri laxa á undanförnum árum.

Þorsteinn Þorsteinsson, frá Skálpastöðum í Lundareykjardal, skrifar stuttan pistil á vef Landssambands veiðifélaga þar sem hann segir:

"Ég lét þess getið í síðustu viku, í tengslum við fréttina um stórlaxinn úr Laxá í Aðaldal, að við fljótlega athugun hefði ég ekki fundið heimildir um annan stærri síðastliðna fjóra áratugi. Mér hefur verið rækilega bent á að ég hefði átt að leita betur," segir Þorsteinn í pistli á vef Landssambands veiðifélaga - angling.is.

"Úr Vatnsdalsá fékk ég þær fréttir að þar hefði veiðst 115 cm langur lax þann 20. september 2006. Þar er líka til mynd af öðrum laxi – 122 cm löngum, sem veiddist 1998. Árið þar á undan bókuðu franskir veiðimenn 123 cm langan lax, sem því miður vantar mynd af."

Veiðivísir greindi frá viðureign Björns Magnússonar við stórlaxinn í Laxá í Aðaldal fyrir nokkrum dögum. Fréttina má lesa hér.

trausti@frettabladid.is